ການເຄື່ອນໄຫວຂອງທ່ານເຈົ້າແຂວງ-ຮອງເຈົ້າແຂວງ

ການນຳຂອງແຂວງ ເຂົ້າຮ່ວມງານບຸນກິນຈຽງ (ໜໍເປ່ເຈົ່າ) ຂອງຊົນເຜົ່າມົ້ງ ບ້ານຈອມຈຸກ ແລະ ບ້ານຝາຍ ເມືອງຫ້ວຍຊາຍ

ໃນເວລາຕອນເຊົ້າ ຂອງວັນທີ 30 ທັນວາ 2016, ສະຫາຍ ປອ. ຄໍາພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ-ເຈົ້າແຂວງໆບໍ່ແກ້ວ, ພ້ອມຄະນະ ໄດ້ເຂົ້າຮ່ວມ ງານບຸນກີນຈຽງ(ໜໍເປ່ເຈົ່າ) ຂອງຊົນເຜົ່າມົ້ງ ບ້ານຈອມຈຸກ ເມືອງຫ້ວຍຊາຍ, ແຂວງບໍ່ແກ້ວ, ເຊິ່ງສະຫາຍ ສິງທອງ ວິລະສຸກ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຫ້ວຍຊາຍ ພ້ອມດ້ວຍ ຄະນະປະຈຳ,ກໍາມະການພັກເມືອງ, ພະນັກງານກໍ່ສ້າງຮາກຖານ ປະຈໍາກຸ່ມບ້ານຄະນະພັກຮາກຖານ, ເລຂາພັກບ້ານ ຕະຫຼອດຮອດ ອົງການຈັດຕັ້ງ ແລະ ພໍ່ແມ່ປະຊາຊົນຊາວບ້ານຈອມຈຸກ ໄດ້ໃຫ້ການຕ້ອນຮັບຢ່າງສົມກຽດ.

ໃນໂອກາດນີ້, ສະຫາຍ ລີ່ຕູ່ເລັ່ງ ຈົງເຕັງ ຕາງໜ້າເຈົ້າກົກ-ເຈົ້າເລົ່າ ກໍ່ໄດ້ຂຶ້ນລາຍງານປະຫວັດ ຄວາມເປັນມາຂອງຊົນເຜົ່າມົ້ງ ແລະ ການຈັດງານບຸນກີນຈຽງ(ໜໍເປ່ເຈົ່າ) ປະຈໍາປີ 2016 ຂອງບ້ານຈອມຈຸກ, ຈາກນັ້ນສະຫາຍ ຈົ່ງວາຢ່າງ ນາຍບ້ານໆຈອກຈຸກ ໄດ້ລາຍງານສະພາບ ການຈັດຕັ້ງປະຕິບັດວຽກງານແຕ່ລະດ້ານ ຂອງບ້ານ, ເປັນຕົ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ, ແຜນພັດທະນາເສດຖະກິດ-ສັງຄົມ ຂອງບ້ານ, ເຊິ່ງໄດ້ຍົກໃຫ້ເຫັນການເຕີບໃຫຍ່ ຂະຫຍາຍຕົວຂອງຂົງເຂດເສດຖະກິດ, ໃນຕະຫຼອດໄລຍະທີ່ຜ່ານມາ ບ້ານຈອມຈຸກ ແມ່ນສາມາດຮັກສາໄດ້ຄວາມສະຫງົບໂດຍພື້ນຖານ, ເສດຖະກິດມີການຂະຫຍາຍຕົວ ຢ່າງຕໍ່ເນື່ອງ ແລະ ໝັ້ນທ່ຽງ, ເຊິ່ງເຮັດໃຫ້ຊີວິດການເປັນຢູ່ ຂອງພໍ່ແມ່ປະຊາຊົນ ພາຍໃນບ້ານຈອມຈຸກ ໄດ້ຮັບການຍົກລະດັບຂຶ້ນເປັນກ້າວໆ.

 

ຈາກນັ້ນ, ທ່ານ ເຈົ້າແຂວງໆບໍ່ແກ້ວ ກໍ່ໄດ້ຕີລາຄາສູງຕໍ່ຜົນງານທີ່ຄະນະພັກເມືອງ ກໍ່ຄື ປະຊາຊົນຊາວບ້ານຈອມຈຸກ ທີ່ຍາດມາໄດ້, ພ້ອມດຽວກັນນັ້ນ, ທ່ານຍັງໄດ້ເນັ້ນໜັກໃຫ້ຄະນະພັກ-ຄະນະນໍາ ຂອງເມືອງຫ້ວຍຊາຍ ກໍ່ຄື ຄະນະພັກ-ອົງການປົກຄອງ ບ້ານຈອມຈຸກ ເອົາໃຈໃສ່ໃນວຽກງານ ການປ້ອງກັນຊາດ-ປ້ອງກັນຄວາມສະຫງົບ ເພາະວ່າຍຸດທະສາດ ຂອງອິດທິກຳລັງປໍລະປັກ ຍັງສືບຕໍ່ກຳສະພາບພາຍໃນຂອງພວກເຮົາ ເພື່ອສ້າງເງື່ອນໄຂ ສ້າງຄວາມແຕກແຍກ ຢູ່ພາຍໃນ, ເຊິ່ງມາດຕະການແກ້ໄຂອັນສຳຄັນ ແມ່ນການກໍ່ສ້າງຮາກຖານ, ການປັບປຸງກຳລັງ ປກສ-ກອງຫຼອນບ້ານ ໃຫ້ມີຄວາມເຂັ້ມແຂງ, ການສ້າງສະຕິເປັນເຈົ້າຂອງປະຊາຊົນ; ສຳລັບການພັດທະນາເສດຖະກິດ-ສັງຄົມ ແມ່ນສືບຕໍ່ເຜີຍແຜ່ເຊື່ອມຊຶມໃຫ້ປະຊາຊົນກຳແໜ້ນ ກ່ຽວກັບເນື້ອໃນຈິດໃຈ, ຄາດໝາຍ ໃນມະຕິກອງປະຊຸມໃຫຍ່ ອົງຄະນະພັກເມືອງ, ການຜັນຂະຫຍາຍ ໃຫ້ເປັນອັນລະອຽດຂອງບ້ານ ເພື່ອສືບຕໍ່ປະຕິບັດໃຫ້ມີຜົນສໍາເລັດຕົວຈິງສູງ.

ໃນຕອນບ່າຍຂອງວັນດຽວກັນ ທ່ານ ເຈົ້າແຂວງໆບໍ່ແກ້ວ ພ້ອມດ້ວຍຄະນະ, ໄດ້ເຂົ້າຮ່ວມງານບຸນກີນຈຽງ ໜໍເປ່ເຈົ່າ ຂອງຊົນເຜົ່າມົ້ງ ຢູ່ບ້ານຝາຍ, ສະຫາຍ ດົວປໍ່ ສົມປາວວ່າງ ຕາງໜ້າເຈົ້າກົກ-ເຈົ້າເລົ່າ ໄດ້ລາຍງານສະພາບລວມໂດຍຫຍໍ້ ກ່ຽວກັບປະຫວັດຄວາມເປັນມາ ຂອງການຈັດງານບຸນກີນຈຽງ. ຈາກນັ້ນ ສະຫາຍ ວິໄຊວ່າງ ນາຍບ້ານໆຝາຍ ໄດ້ຮັບຟັງການລາຍງານຫຍໍ້ ວຽກງານການພັດທະນາເສດຖະ ກິດ-ສັງຄົມ ຂອງບ້ານຝາຍ ໃນໄລຍະຜ່ານມາ,  ຈາກນັ້ນ ທ່ານ ເຈົ້າແຂວງໆບໍ່ແກ້ວ ກໍ່ໄດ້ຕີລາຄາສູງຕໍ່ຜົນງານທີ່ຄະນະພັກເມືອງ ກໍຄື ປະຊາຊົນຊາວບ້ານຝາຍ ທີ່ຍາດມາໄດ້ ແລະ ໄດ້ມອບວັດຖຸ-ປັດໃຈຈໍານວນໜຶ່ງ ໃຫ້ຄະນະພັກ, ອົງການປົກຄອງ ກໍຄື ພໍ່ແມ່ປະຊາຊົນຂອງ 2 ບ້ານ(ບ້ານຈອມຈຸກ ແລະ ບ້ານຝາຍ) ເພື່ອນໍາໃຊ້ເຂົ້າໃນວຽກງານລວມຂອງບ້ານ ໃຫ້ມີຄວາມສະດວກອີກດ້ວຍ.

ແຜນທີແຂວງບໍ່ແກ້ວ

ເບີໂທສຸກເສີນ

- ຕຳຫຼວດ: 084 211 338
- ດັບເພີງ: 084 211 382
- ຈໍລະຈອນ: 084 211 382
- ລົດໂຮງໝໍ: 084 211 048
- ໄຟຟ້າ: 084 1199
- ນໍ້່າປະປາ: 084 121 382