ການເຄື່ອນໄຫວຂອງທ່ານເຈົ້າແຂວງ-ຮອງເຈົ້າແຂວງ

ແຂວງບໍ່ແກ້ວ ສະເຫຼີມສະຫຼອງ ວັນທີ 1 ມິຖຸນາ 2017.

ແຂວງບໍ່ແກ້ວ ຮ່ວມກັບຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກແຂວງ(ຄມດ) ໄດ້ຈັດງານສະເຫຼີມສະຫຼອງ ວັນເດັກນ້ອຍສາກົນ (1 ມິຖຸນາ) ຂຶ້ນໃນຕອນເຊົ້າ ຂອງວັນທີ 1 ມິຖຸນາ 2017 ທີ່ສະໂມສອນແຂວງບໍ່ແກ້ວ ໂດຍການເປັນກຽດເຂົ້າຮ່ວມຂອງ ທ່ານ ປອ. ຄຳພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ-ເຈົ້າແຂວງໆບໍ່ແກ້ວ, ທ່ານ ຈອມສີ ລັດຕະນະປັນ ຮອງເຈົ້າແຂວງໆບໍ່ແກ້ວ, ປະທານ ຄມດ ແຂວງ, ມີບັນດາການນຳຂອງແຂວງ-ເມືອງ, ຜູ້ປົກຄອງ, ຄູອາຈານ ແລະ ນ້ອງນ້ອຍນັກຮຽນ ເຂົ້າຮ່ວມຢ່າງມີບັນຍາກາດຟົດຟື້ນ.ໃນການຈັດງານຄັ້ງນີ້, ຈັດຂຶ້ນໂດຍຕິດພັນກັບ ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ, ວັນສາກົນລຶບລ້າງການໃຊ້ແຮງງານເດັກ 12 ມິຖຸນາ 2017 ແລະ ສັບປະດາສັກຢາ ກັນພະຍາດສາກົນ ປີ 2017. ໃນພິທີ ທ່ານ ຈອມສີ ລັດຕະນະປັນ ໄດ້ຂຶ້ນກ່າວຄຳປາໃສ ແລະ ໄດ້ຍົກໃຫ້ເຫັນ ຄວາມເອົາໃຈໃສ່ຂອງ ພັກ ແລະ ລັດຖະບານ ຕໍ່ກັບວຽກງານພັດທະນາເດັກ ທີ່ເປັນອະນາຄົດຂອງຊາດ, ການມີສ່ວນຮ່ວມຂອງໝົດທຸກຄົນ ແລະ ທຸກພາກສ່ວນ ຕໍ່ກັບການປົກປ້ອງສິດ ແລະ ຜົນປະໂຫຍດຂອງເດັກ ໂດຍສະເພາະ ການປະຕິບັດພັນທະຕໍ່ສາກົນ ໃນສົນທິສັນຍາ ວ່າດ້ວຍການລຶບລ້າງທຸກຮູບການ ທີ່ຈຳແນກຕໍ່ແມ່ຍິງ ແລະ ສົນທິສັນຍາວ່າດ້ວຍ ສິດທິເດັກ ລວມເຖິງອະນຸສັນຍາ 2 ສະບັບກ່ຽວກັບເດັກ ແລະ ການຈັດຕັ້ງຜັນຂະຫຍາຍ ແຜນຍຸດທະສາດແຫ່ງຊາດ, ແຜນງານແຫ່ງຊາດ 5 ປີ ກ່ຽວກັບວຽກງານ ແມ່ ແລະ ເດັກ (2014-2020). ນອກຈາກນີ້, ຍັງໄດ້ເອົາໃຈໃສ່ປັບປຸງກົນໄກ ແລະ ການຈັດຕັ້ງໃຫ້ມີຄວາມໜັກແໜ້ນເຂັ້ມແຂງ, ປະຕິບັດໜ້າທີ່ ແລະ ພາລະບົດບາດຂອງຕົນ ຕິດພັນກັບວຽກງານຈຸດສຸມຂອງລັດຖະບານ, ການຈັດຕັ້ງປະຕິບັດບັນດາໂຄງການ ແລະ ກິດຈະກຳ ເຂົ້າໃນຂະແໜງການຕ່າງໆ ຢ່າງມີປະສິດທິພາບ ແລະ ປະສິດທິຜົນ ເປັນຢ່າງດີ.

ໃນພິທີສະເຫຼີມສະຫຼອງຄັ້ງນີ້, ທ່ານ ເຈົ້າແຂວງໆບໍ່ແກ້ວ, ຄະນະນຳຂອງແຂວງ ຂອງເມືອງ ຍັງໄດ້ຮ່ວມກັນແຈກຢາຍອາຫານ, ເຂົ້າໜອມ ແລະ ຢອດຢາກັນພະຍາດ ໃຫ້ແກ່ຫຼານນ້ອຍ-ນັກຮຽນ. ພ້ອມດຽວກັນນີ້ ຜູ້ເຂົ້າຮ່ວມ ຍັງໄດ້ຮັບຊົມການສະແດງ ສີລະປະ ວັນນະຄະດີ ຂອງນ້ອງນ້ອຍ-ນັກຮຽນ ຈາກບັນດາໂຮງຮຽນ ພາຍໃນເທດສະບານແຂວງ, ລວມເຖິງບັນດາກິດຈະກຳ ທີ່ສະພາອຸດສາຫະກຳ ແລະ ການຄ້າແຂວງ ຈັດຂຶ້ນ ເປັນຕົ້ນ ງານວາງສະແດງສິນຄ້າ ຕະຫຼາດນັດ ແລະ ການສະແດງຄອນເສີດ ເຊິ່ງເລີ່ມແຕ່ວັນທີ 1-7/06/2017.

ແຜນທີແຂວງບໍ່ແກ້ວ

ເບີໂທສຸກເສີນ

- ຕຳຫຼວດ: 084 211 338
- ດັບເພີງ: 084 211 382
- ຈໍລະຈອນ: 084 211 382
- ລົດໂຮງໝໍ: 084 211 048
- ໄຟຟ້າ: 084 1199
- ນໍ້່າປະປາ: 084 121 382