ການເຄື່ອນໄຫວຂອງທ່ານເຈົ້າແຂວງ-ຮອງເຈົ້າແຂວງ

ພິທີເປີດ ການຮຽນທິດສະດີ ການເມືອງ-ການປົກຄອງ ໂຄງການຊັ້ນຕົ້ນ (ພາກຄ່ຳ) ຮຸ່ນທີ III

        ໃນວັນທີ 22 ກັນຍາ 2017 ຜ່ານມາ ໂຮງຮຽນການເມືອງ-ການປົກຄອງ ແຂວງບໍ່ແກ້ວ ໄດ້ຈັດພິທີເປີດ ການຮຽນໂຄງການຊັ້ນຕົ້ນ (ພາກຄ່ຳ) ຮຸ່ນທີ III ຂອງແຂວງບໍ່ແກ້ວຂຶ້ນ. ໂດຍການເປັນປະທານຂອງ ທ່ານ ຄຳແປງ ໃຈຍະສັກ ຄະນະປະຈຳພັກແຂວງ, ຫົວໜ້າຄະນະ ໂຄສະນາ-ອົບຮົມແຂວງ, ຜູ້ຊີ້ນຳໂຮງຮຽນການເມືອງ-ການປົກຄອງແຂວງບໍ່ແກ້ວ. ໃນພິທີຄັ້ງນີ້ ມີແຂກເຂົ້າຮ່ວມ ຈາກບັນດາພະແນກການ ອ້ອມຂ້າງແຂວງ, ບັນດາຄູ-ອາຈານ ແລະ ນັກສຶກສາ ທັງໝົດ 60 ທ່ານ. ການເປີດຊຸດຮຽນ ທິດສະດີການເມືອງ-ການປົກຄອງ ຊັ້ນຕົ້ນ (ພາກຄ່ຳ) ຊຸດທີ III ຄັ້ງນີ້ ປະກອບມີນັກສຶກສາທັງໝົດ 41 ທ່ານ, ຍິງ 11 ທ່ານ ເຊິ່ງມາຈາກບັນດາ ພະແນກການອ້ອມຂ້າງແຂວງ ແລະ ອົງການຈັດຕັ້ງມະຊົນຕ່າງໆ.

  

        ເພື່ອອີງໃສ່ ຄວາມຮຽກຮ້ອງຕ້ອງການ ໃນການຍົກລະດັບທິດສະດີການເມືອງ ໃຫ້ພະນັກງານ ຢູ່ຮາກຖານ ແລະ ກົມກອງທ້ອງຖິ່ນ ໃນເງື່ອນໄຂຕົວຈິງ, ຈຸດປະສົງຫຼັກກໍ່ເພື່ອ ສ້າງພະນັກງານຄຸ້ມຄອງ ແລະ ພະນັກງານນຳພາຮຸ່ນສືບທອດ ຢູ່ບັນດາພະແນກການອ້ອມຂ້າງ ແຂວງ, ທະຫານ,ຕໍາຫຼວດ ແລະ ຂົງເຂດລັດວິສາຫະກິດ ໃຫ້ມີລະດັບຄວາມຮູ້ ທາງດ້ານທິດສະດີການເມືອງ-ການປົກຄອງ, ແນວທາງ ນະໂຍບາຍ ຂອງພັກ, ການຄຸ້ມຄອງຂອງລັດ. ພ້ອມກັນນັ້ນ, ແມ່ນເຮັດໃຫ້ນັກສຶກສາມີຄວາມຮັບຮູ້ໃໝ່ ແລະ ກຳແໜ້ນບັນດາຫຼັກມູນ ພື້ນຖານ ທິດສະດີ “ມາກ-ເລນິນ” ເພື່ອຍົກລະດັບ ຄວາມສາມາດໃນການໝູນໃຊ້ ບັນດາຫຼັກມູນທິດສະດີ ທີ່ຮຽນມາເຂົ້າໃສ່ຈຸດພິເສດຕົວຈິງ ຂອງຂົງເຂດວຽກງານ ທີ່ຕົນຮັບຜິດຊອບຢ່າງມີຫົວຄິດປະດິດສ້າງ ແລະ ມີໝາກຜົນແກ່ກົມກອງທ້ອງຖິ່ນກໍ່ຄືປະເທດຊາດ. ແຜນການຮຽນ-ການສອນ ໃນຄັ້ງນີ້ແມ່ນ ໃຊ້ເວລາ 3 ເດືອນ  ເຊິ່ງປະກອບມີເນື້ອໃນບົດ ຮຽນທັງໝົດ  15 ໜ່ວຍກິດ ປະກອບມີ 9 ວິຊາແລະ ແບ່ງອອກເປັນ 3 ໝວດ.
        ໃນຕອນທ້າຍພິທີ ທ່ານ ຄຳແປງ ໃຈຍະສັກ ຄະນະປະຈຳພັກແຂວງ, ຫົວໜ້າຄະນະໂຄສະນາ-ອົບຮົມແຂວງ, ຜູ້ຊີ້ນຳໂຮງຮຽນການ ເມືອງ-ການປົກຄອງແຂວງ ທັງເປັນປະທານພິທີ ໄດ້ມີຄຳເຫັນໂອ້ລົມ ແລະ ຊີ້ທິດເຍືອງທາງໃຫ້ ໃນການດຳເນີນ ການຮຽນ-ການສອນ ໃຫ້ ສຳເລັດຕາມຈຸດປະສົງ, ພ້ອມນີ້ ຍັງໄດ້ເໜັ້ນໜັກໃສ່ລະບົບການຮຽນ-ການສອນ ເປັນຕົ້ນ:

     1. ທາງໂຮງຮຽນໃນຖານະເປັນເຈົ້າຂອງໂຄງການ ຕ້ອງຍົກສູງຄວາມພະຍາຍາມໃນການ ຄຸ້ມຄອງ, ຕິດຕາມ, ກວດກາ ແລະ ປະ ເມີນຜົນການ ຄົ້ນຄວ້າຮ່ຳຮຽນ ແລະ ສິດສອນຂອງຄູອາຈານ ເພື່ອຊຸກຍູ້ສົ່ງເສີມດ້ານຕັ້ງໜ້າແກ້ໄຂ ຈຸດອ່ອນ, ຂໍ້ຄົງຄ້າງ ໃຫ້ທັນເວລາ, ຖືກຕ້ອງກັບຄວາມ ເປັນຈິງ.

     - ເອົາໃຈໃສ່ຂອດພົວພັນປະສານງານ ກັບພາກສ່ວນທີ່ກ່ຽວຂ້ອງຢ່າງລຽນຕິດ ເພື່ອເຮັດໃຫ້ຊຸດຮຽນດຳເນີນເປັນປົກກະຕິ, ປະຕິບັດ ລະບອບ ສ່ອງແສງລາຍງານ ສະພາບການຮຽນ-ການສອນ ໃຫ້ແກ່ຄະນະປະຈຳພັກແຂວງ ເພື່ອຂໍທິດຊີ້ນຳ ແລະ ແກ້ໄຂຄວາມຫຍຸ້ງຍາກໃຫ້ ຖືກຕ້ອງຕາມ ສະພາບຄວາມເປັນຈິງ.

     2. ທາງດ້ານນັກສຶກສາ ໄດ້ເໜັ້ນໜັກວ່າຕ້ອງໄດ້ເອົາໃຈໃສ່ຝຶກຝົນຕົນເອງຢ່າງຕັ້ງໜ້າ, ອົດທົນຜ່ານຜ່າຄວາມຫຍຸ້ງຍາກ, ເກັບກ່ຽວເອົາ ຄວາມຮູ້ຈາກຄູ-ອາຈານ, ພ້ອມກັນນັ້ນ ກໍ່ເອົາຄວາມຮູ້ທາງດ້ານທິດສະດີສົມທຽບພຶດຕິກຳຂອງຕົນເອງ ທີ່ໄດ້ປະຕິບັດຜ່ານມາ, ມີອັນໃດຖືກ, ອັນໃດຜິດ ເພື່ອຈະນຳເອົາທິດສະດີດັ່ງກ່າວໄປປັບປຸງ, ປ່ຽນແປງແບບວິທີເຮັດວຽກຂອງຕົນເອງໃນອະນາຄົດ ໃຫ້ມີປະສິດທິຜົນດີກວ່າເກົ່າ.


ແຜນທີແຂວງບໍ່ແກ້ວ

ເບີໂທສຸກເສີນ

- ຕຳຫຼວດ: 084 211 338
- ດັບເພີງ: 084 211 382
- ຈໍລະຈອນ: 084 211 382
- ລົດໂຮງໝໍ: 084 211 048
- ໄຟຟ້າ: 084 1199
- ນໍ້່າປະປາ: 084 121 382