ການເຄື່ອນໄຫວຂອງທ່ານເຈົ້າແຂວງ-ຮອງເຈົ້າແຂວງ

ທ່ານນາຍົກລັດຖະມົນຕີ ເຄື່ອນໄຫວຢ້ຽມຢາມແຂວງບໍ່ແກ້ວ

ໃນວັນທີ 03 ພະຈິກ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງບໍ່ແກ້ວ ໂດຍມີ ທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ ພ້ອມດ້ວຍ ຄະນະພັກ-ຄະນະນຳຂອງແຂວງ ແລະ ອຳນາດການປົກຄອງທ້ອງຖິ່ນ ໃຫ້ການຕ້ອນຮັບຢ່າງອົບອຸ່ນ.

ໂອກາດນີ້, ທ່ານ ຄຳພັນ ເຜີຍຍະວົງ ໄດ້ລາຍງານໃຫ້ຊາບ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ໃນໄລຍະຜ່ານມາ ໂດຍສະເພາະ ແມ່ນໄດ້ເອົາໃຈໃສ່ທາງດ້ານ ການເມືອງ-ແນວຄິດ, ສຸມໃສ່ຊີ້ນໍາການປັບປຸງກໍ່ສ້າງພັກຕາມ 5 ຫຼັກການ 3 ທິດນໍາ, ພ້ອມກັນເປີດບັ້ນດໍາເນີນຊີວິດການເມືອງປັບປຸງ ປົວແປງ ທົ່ວອົງຄະນະພັກແຂວງ ປະຈໍາປີ 2017, ສໍາເລັດ ການດໍາເນີນກອງປະຊຸມສະພາປະຊາຊົນແຂວງ ສະໄໝສາມັນຄັ້ງທີ 3 ສະໄໝທີ I, ສືບຕໍ່ຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ; ໄດ້ເອົາໃຈໃສ່ຈັດຕັ້ງ ປະຕິບັດບັນດາໂຄງການລົງທຶນຂອງລັດ ຄຽງຄູ່ກັບການຍາດແຍ່ງ ດຶງດູດການລົງທຶນ; ໄດ້ຈັດກອງປະຊຸມສໍາມະນາ ສົ່ງເສີມການທ່ອງທ່ຽວ, ກອງປະຊຸມພົບປະ ລະຫວ່າງ ອົງການປົກຄອງແຂວງ ກັບພາກທຸລະກິດ ຕິດພັນກັບການຈັດງານຕະຫຼາດນັດ ວາງສະແດງສິນຄ້າ, ສົ່ງເສີມການຜະລິດ ແລະ ເປີດກວ້າງຕະຫຼາດຈຳໜ່າຍສິນຄ້າ ເຮັດໃຫ້ເສດຖະກິດຂອງແຂວງ ໄດ້ຮັບການພັດທະນາ ຢ່າງຕໍ່ເນື່ອງ ແລະ ຖືກທິດ ໂດຍຂະຫຍາຍຕົວໃນລະດັບ 7,3%, ລາຍຮັບສະເລ່ຍໄດ້ 1.652 ໂດລາສະຫະລັດຕໍ່ຄົນຕໍ່ປີ, ການລົງທຶນຂອງລັດ ທີ່ໄດ້ຮັບການອະນຸມັດຈາກສະພາແຫ່ງຊາດ ມີ 120 ໂຄງການ ມູນຄ່າ 113 ກວ່າຕື້ກີບ ສາມາດຈັດຕັ້ງປະຕິບັດໄດ້ 90% ຂອງແຜນການປີ; ສາມາດຈັດເກັບລາຍຮັບງົບປະມານ ໃນ 10 ເດືອນຕົ້ນປີ ໄດ້ 74,29% ຂອງແຜນການປີ. ປະຈຸບັນ, ທົ່ວແຂວງຍັງມີບ້ານທຸກຍາກ 41 ບ້ານ. ໃນນີ້, ໄດ້ສຸມໃສ່ສ້າງແຜນແກ້ໄຂຄວາມທຸກຍາກ ຈໍານວນ 10 ບ້ານ (ເມືອງລະ 2 ບ້ານ).

ໂອກາດນີ້, ທ່ານນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍ ຕໍ່ບັນດາຜົນງານ ທີ່ຄະນະພັກ-ຄະ ນະນຳແຂວງ ໄດ້ພ້ອມພຽງຮຽງໜ້າກັບພໍ່ແມ່ປະຊາຊົນຊາວແຂວງບໍ່ແກ້ວ ບຸກບືນພັດ ທະນາບັນດາພື້ນຖານໂຄງລ່າງ ແລະ ປັດໄຈຕ່າງໆ ເຮັດໃຫ້ແຂວງບໍ່ແກ້ວ ມີໃບໜ້າອັນໃໝ່ຂຶ້ນມາຢ່າງຫຼວງຫຼາຍ. ພ້ອມນີ້, ທ່ານຍັງໄດ້ຍົກໃຫ້ເຫັນ ສະພາບການພົ້ນເດັ່ນ ທີ່ເກີດຂຶ້ນໃນພາກພື້ນ ແລະ ສາກົນ ອັນເປັນຜົນກະທົບທັງທາງດ້ານບວກ ແລະ ດ້ານລົບ ຕໍ່ປະເທດເຮົາ ລວມທັງ ໝາກຜົນຂອງການຈັດຕັ້ງປະຕິບັດວຽກງານ ໃນໄລຍະຊຸມປີທີ່ຜ່ານມາ ຂອງຄະນະລັດຖະບານ ຊຸດທີ 8 ທີ່ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ 8; ສຳລັບປີ 2018 ກໍ່ຍັງມີສິ່ງທ້າທາຍຫຼາຍຢ່າງ ທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂ ເປັນຕົ້ນ ຄວາມທຸກຍາກຂອງປະຊາຊົນ, ບັນດາກົນໄກ ການຈັດຕັ້ງປະຕິບັດວຽກງານ ໃນແຕ່ລະຂົງເຂດ ຖ້າຕິດຂັດຢູ່ຈຸດໃດ ໃຫ້ແກ້ໄຂຢູ່ຈຸດນັ້ນ ກ້າວໄປສູ່ການບໍລິຫານວຽກງານ ໃຫ້ດີຂຶ້ນເປັນກ້າວໆ; ສ່ວນແຂວງບໍ່ແກ້ວ ເປັນແຂວງທີ່ໄດ້ສ້າງພື້ນຖານອັນໜັກແໜ້ນ ແລະ ມີເງື່ອນໄຂສະດວກຫຼາຍດ້ານ ກໍ່ຂໍໃຫ້ເປັນຕົວຢ່າງ ໃນການຈັດຕັ້ງປະຕິບັດບັນດານິຕິກຳ ກໍ່ຄືແນວທາງນະໂຍບາຍຂອງ ພັກ ແລະ ລັດຖະບານ ວາງອອກໃນແຕ່ລະໄລຍະ ອັນເປັນການສ້າງຄວາມເຊື່ອໝັ້ນ ໃຫ້ແກ່ປະຊາຊົນ; ໃຫ້ພ້ອມກັນປົດປ່ອຍສິ່ງທີ່ຕິດຂັດ ໂດຍການຈັດ ຕັ້ງ ປະຕິບັດ 3 ເປີດ ຄື: ເປີດປະຕູ, ເປີດສິ່ງກີດຂວາງ ແລະ ເປີດໃຈ ເພື່ອດຶງດູດການລົງທຶນ ແຕ່ກໍ່ຕ້ອງມີການຕິດຕາມກວດກາຄືນ ໃນບັນດາໂຄງການລົງທຶນເຫຼົ່ານັ້ນ ເພື່ອເຮັດໃຫ້ຕ່າງຝ່າຍ ຕ່າງໄດ້ຮັບຜົນປະໂຫຍດ ໂດຍສະເພາະ ປະຊາຊົນຢູ່ໃນທ້ອງຖິ່ນ; ຊຸກຍູ້ໃຫ້ປະຊາຊົນ ຮູ້ທຳມາຫາກິນ ດ້ວຍວິທີການໃໝ່ ແລະ ທັນສະ ໄໝ ເພື່ອປັບປຸງຊີວິດການເປັນຢູ່ຂອງເຂົາເຈົ້າ ໃຫ້ນັບມື້ດີຂຶ້ນເປັນກ້າວໆ.

ແຜນທີແຂວງບໍ່ແກ້ວ

ເບີໂທສຸກເສີນ

- ຕຳຫຼວດ: 084 211 338
- ດັບເພີງ: 084 211 382
- ຈໍລະຈອນ: 084 211 382
- ລົດໂຮງໝໍ: 084 211 048
- ໄຟຟ້າ: 084 1199
- ນໍ້່າປະປາ: 084 121 382