ການເຄື່ອນໄຫວຂອງທ່ານເຈົ້າແຂວງ-ຮອງເຈົ້າແຂວງ

ຮອງປະທານປະເທດ ເຄື່ອນໄຫວເຮັດວຽກ ແລະ ຢ້ຽມຢາມ ປະຊາຊົນ ຜູ້ທີ່ຖືກຜົນກະທົບ ຈາກໄພພິບັດ ທາງທຳມະຊາດ.

ໃນວັນທີ 5 ສິງຫາ 2018 ພະນະທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳ ການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ, ພ້ອມດ້ວຍຄະນະ ໄດ້ລົງມາພົບປະ ຢ້ຽມຢາມ ປະຊາຊົນ ຜູ້ທີ່ຖືກຜົນກະທົບໄພພິບັດ ຢູ່ບ້ານທ່າຟ້າ ເມືອງຫ້ວຍຊາຍ, ພ້ອມທັງ ໄດ້ມອບເຄື່ອງບັນເທົາທຸກ ໃຫ້ແກ່ປະຊາຊົນ ຜູ້ທີ່ຖືກຜົນກະທົບ ຈຳນວນໜຶ່ງ.

ໃນມື້ຕໍ່ມາ ທ່ານ ຮອງປະທານປະເທດ ໄດ້ສືບຕໍ່ພົບປະໂອ້ລົມ ການນຳຂອງແຂວງບໍ່ແກ້ວ ຢູ່ທີ່ຫ້ອງວ່າການແຂວງ. ເຊິ່ງມີບັນທ່ານ ຮອງລັດຖະມົນຕີກະຊວງ, ຫົວໜ້າກົມ-ຮອງກົມ ແລະ ຄະນະປະຈຳພັກແຂວງ ເຂົ້າຮ່ວມ. ໃນພິທີ ທ່ານ ຄຳພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ-ເຈົ້າແຂວງ ແຂວງບໍ່ແກ້ວ ໄດ້ລາຍງານ ສະພາບການຈັດຕັ້ງ ປະຕິບັດວຽກງານພົ້ນເດັ່ນ ທີ່ແຂວງບໍ່ແກ້ວ ສາມາດຍາດມາໄດ້ ໃນໄລຍະ 6 ເດືອນຕົ້ນປີ 2018, ໄດ້ຍົກໃຫ້ເຫັນເຖິງ ຈັງຫວະການຂະຫຍາຍຕົວ ທາງດ້ານເສດຖະກິດ-ສັງຄົມ ຂອງແຂວງ ຢູ່ໃນລະດັບ 7,5% (ມະຕິສະພາປະຊາ ຊົນແຂວງ ຮັບຮອງ 7,8%), ສະເລ່ຍລາຍຮັບຕໍ່ຫົວຄົນໄດ້ 1.673 ໂດລາ/ຄົນ/ປີ; ໂຄງປະກອບເສດຖະກິດ ດ້ານກະສິກໍາ-ປ່າໄມ້, ອຸດສາຫະກໍາ ແລະ ການບໍລິການ ກໍ່ມີການຂະຫຍາຍຕົວເພີ່ມຂຶ້ນ ຢ່າງຕໍ່ເນື່ອງ.

ວຽກງານການເກັບລາຍຮັບງົບປະມານ: ລວມທັງລາຍຮັບຂອງສູນກາງ ແລະ ແຂວງ ປະຕິບັດໄດ້ 156 ກວ່າຕື້ກີບ ເທົ່າກັບ 47,78% ຂອງແຜນການປີ; ລາຍຈ່າຍປະຕິບັດໄດ້ 136 ກວ່າຕື້ກີບ, ເທົ່າກັບ 44,97% ຂອງແຜນການປີ ໂດຍໄດ້ໃຫ້ບູລິມະສິດ ການຈ່າຍເງິນເດືອນ ແລະ ເງິນອຸດໜູນນະໂຍບາຍຕ່າງໆ ໄດ້ຢ່າງເປັນປົກກະຕິ.

ວຽກງານການລົງທຶນ: ໄດ້ຈັດຕັ້ງປະຕິບັດ ບັນດາໂຄງການລົງທຶນຂອງລັດ ທີ່ສະພາໄດ້ຮັບຮອງເອົາໄດ້ 84ໂຄງການ ໃນຈໍານວນທັງໝົດ 118 ໂຄງການ ແລະ ພວມສືບຕໍ່ປະຕິບັດ 34 ໂຄງການ ແລະ ຈະປະຕິບັດໃຫ້ສໍາເລັດພາຍໃນທ້າຍປີ. ນອກຈາກນັ້ນ ຍັງໄດ້ເປັນເຈົ້າການຂົນຂວາຍ, ຍາດແຍ່ງ ແລະ ປະຕິບັດ ບັນດາໂຄງການຊ່ວຍເຫຼືອ ເພື່ອການພັດທະນາ.

ວຽກກະສິກໍາ-ປ່າໄມ້: ຮັບປະກັນ ທາງດ້ານສະບຽງອາຫານ ໃຫ້ແກ່ສັງຄົມ ໄດ້ຢ່າງພຽງພໍ, ເປັນຕົ້ນການຜະລິດເຂົ້າແມ່ນເຫຼືອກິນ ແລະ ມີແຮໄວ້ຂາຍ; ໃນປີ 2018 ນີ້ ທົ່ວແຂວງສາມາດປັກດໍາເຂົ້ານາແຊງ ໃນເນື້ອທີ່ 1.622 ເຮັກຕາ ຜົນຜະລິດ 6.767 ໂຕນ; ນາປີມີເນື້ອທີ່ 14.760 ເຮັກຕາ ໄດ້ປັກດໍາໄປແລ້ວ 90% ຄາດຄະເນຜົນຜະລິດ 59.040ໂຕນ; ເນື້ອທີ່ເຂົ້າໄຮ່ 7.218 ເຮັກຕາ, ຄາດຄະເນຜົນຜະລິດ 12.900 ໂຕນ. ການຜະລິດກະສິກໍາເປັນສິນຄ້າ ໄດ້ມີການຂະຫຍາຍຕົວດີ ສາມາດສົ່ງອອກ ຜະລິດຕະພັນ ສິນຄ້າ ໄປຈີນ ແລະ ໄທ. ເປັນຕົ້ນແມ່ນ ກ້ວຍຫອມ, ຢາງພາລາ, ເຂົ້າ, ໝາກອຶ, ໝາກນັດ, ໝາກເດືອຍ, ໝາກໂມ, ຖົ່ວຝັກຍາວ, ສາລີຫວານ, ຫົວອີບຸກ, ເປືອກບົງ. ລວມປີໜຶ່ງ 2 ແສນກ່ວາໂຕນ.

ວຽກງານພັດທະນາຊົນນະບົດ: ສືບຕໍ່ຫັນລົງກໍ່ສ້າງຮາກຖານການເມືອງ ພັດທະນາຊົນນະບົດ ຮອບດ້ານ ໂດຍຕິດພັນກັບວຽກງານ 3 ສ້າງ, ເຊິ່ງພວກເຮົາໄດ້ຫັນເອົາ ພະນັກງານຫຼັກແຫຼ່ງ ຂອງແຂວງ ແລະ ເມືອງ ລົງປະຕິບັດ ໂຄງການເຮັດທົດລອງ 10 ບ້ານເປົ້າໝາຍ ໃນການແກ້ໄຂຄວາມທຸກຍາກ ໂດຍມີສ່ວນຮ່ວມຂອງທຸກພາກສ່ວນ  ຕາມທິດ ລັດ ແລະ ປະຊາຊົນ ພ້ອມກັນເຮັດ.

ໂອກາດນີ້, ພະນະທ່ານ ພັນຄຳ ວິພາວັນ ຮອງປະທານປະເທດ ໄດ້ມີຄຳເຫັນໂອ້ລົມ ເນັ້ນໜັກບາງບັນຫາ ໃຫ້ການນຳຂອງແຂວງ ຈົ່ງພ້ອມກັນສືບຕໍ່ຍູ້ແຮງ ວຽກງານຫັນລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕິດພັນກັບວຽກງານ 3 ສ້າງ, ຕັ້ງໜ້າແກ້ໄຂບັນຫາ ປະກົດການຫຍໍ້ທໍ້ໃນສັງຄົມ ໃຫ້ຫຼຸດໜ້ອຍຖອຍລົງເທື່ອລະກ້າວ; ສືບຕໍ່ແກ້ໄຂບັນຫາຢາເສບຕິດ, ການຄ້າຂາຍຖືກ, ບັນຫາໄພສັງຄົມ, ການຂີ້ລັກ, ງັດແງະ, ປຸ້ນຈີ້, ອາດສະຍາກໍາອື່ນໆ; ສືບຕໍ່ປະຕິບັດ ບັນດາເປົ້າໝາຍ ສະຫັດສະວັດ ການພັດທະນາຈຸດໝາຍ ເພື່ອກ້າວຂຶ້ນສູ່ ສັງຄົມນິຍົມ ໃນຕໍ່ໜ້າ.

ແຜນທີແຂວງບໍ່ແກ້ວ

ເບີໂທສຸກເສີນ

- ຕຳຫຼວດ: 084 211 338
- ດັບເພີງ: 084 211 382
- ຈໍລະຈອນ: 084 211 382
- ລົດໂຮງໝໍ: 084 211 048
- ໄຟຟ້າ: 084 1199
- ນໍ້່າປະປາ: 084 121 382