ໃນໂອກາດທີ່ຫ້ອງວ່າການລັດຖະບານ ແລະ ແຂວງບໍ່ແກ້ວ ພວມຫ້າງຫາກະກຽມເງື່ອນໄຂດ້ານ ຕ່າງໆ ແລະ ສ້າງຂະບວນການທຸກດ້ານ ເພື່ອເປັນຜົນງານຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ IV ຂອງອົງຄະນະພັກຫ້ອງວ່າການລັດຖະບານ ແລະ ກອງປະຊຸມໃຫຍ່ ຄັ້ງທີ V ຂອງອົງຄະນະພັກຂອງບໍ່ແກ້ວ ທີ່ຈະໄຂຂຶ້ນໃນມໍ່ໆນີ້. ໃນວັນທີ 15 ກໍລະກົດ 2015 ດຣ. ນາງ ວຽງສະຫວັນ ດວງສະຫວັນ ຮອງຫົວໜ້າຫ້ອງວ່າການລັດຖະບານ ພ້ອມຄະນະ ໄດ້ລົງເກັບກຳຂໍ້ມູນ ການພັດທະນາເສດຖະກິດ-ສັງຄົມ ກໍ່ຄືສະພາບທີ່ພົ້ນເດັ່ນ ຢູ່ເມືອງຜາອຸດົມ ແຂວງບໍ່ແກ້ວ.
ໃນໂອກາດນີ້, ທ່ານ ຈັນທອນ ພົນທະລາ ເຈົ້າເມືອງໆຜາອຸດົມໄດ້ລາຍງານສະພາບການ ພັດທະນາເສດຖະກິດ-ສັງຄົມ ຂອງເມືອງຜາອຸດົມ ໂດຍຫຍໍ້ ໃຫ້ຮອງຫົວໜ້າຫ້ອງວ່າການ ແລະ ຄະນະໄດ້ຮັບຊາບ. ປະຈຸບັນທົ່ວເມືອງມີ 73 ບ້ານ, ແບ່ງເປັນ 14 ກຸ່ມບ້ານ, 7.069 ຄອບຄົວ, ມີພົນລະເມືອງ 42.000 ກວ່າຄົນ, ຍັງມີບ້ານທຸກຍາກ 21 ບ້ານ ກວມ 28 ສ່ວນຮ້ອຍ, ຄອບຄົວທຸກຍາກມີ 1.939 ຄອບຄົວ ກວມ 27 ສ່ວນຮ້ອຍ, ມີເນື້ອທີ່ນາ 28.000 ກວ່າເຮັກຕາ ໃນນີ້ມີເນື້ອທີ່ນາແຊງ 900 ກວ່າເຮັກຕາ,ໄດ້ຮັບຜົນຜະລິດເກືອບ 23.000 ໂຕນ, ສະເລ່ຍຜູ້ໜຶ່ງໄດ້ຮັບເຂົ້າເປືອກ 555 ກິໂລ/ຄົນ/ປີ, ລາຍຮັບສະເລ່ຍໃສ່ຫົວຄົນໄດ້ 793 ໂດລາ, ເສດຖະກິດຂອງເມືອງຂະຫຍາຍຕົວໃນລະດັບ 7,3 ສ່ວນຮ້ອຍຕໍ່ປີ, ລວມຍອດຜະລິດຕະພັນພາຍໃນໄລຍະ 5 ປີທີ່ຜ່ານມາບັນລຸ 240 ຕື້ກວ່າກີບ.
ຫຼັງຈາກນັ້ນ, ຮອງຫົວໜ້າຫ້ອງວ່າການລັດຖະບານ ພ້ອມຄະນະ ໄດ້ສືບຕໍ່ໄປເຄື່ອນໄຫວຢ້ຽມຢາມ ແລະ ເກັບກຳຂໍ້ມູນຢູ່ສະຖານທີ່ຕ່າງໆ ເປັນຕົ້ນ: ກຸ່ມເກັບຊື້ຜົນຜະລິດກະສິກໍາຂອງທ່ານ ນາງ ແສງເດືອນ ສອນທະວີ; ສາງເກັບມ້ຽນ ແລະ ຈຳໜ່າຍແນວພັນເຂົ້າຂອງຂະແໜງສົ່ງເສີມກະສິກໍາເມືອງຜາອຸດົມ; ຈຸດສຸມບ້ານໃຫຍ່ນ້ຳຍາວທີຈະສ້າງເປັນຕົວເມືອງນ້ອຍໃນຊົນນະບົດ; ບ້ານຈັດສັນຂອງປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳທາ 1; ຄອບຄົວຕົວແບບ ໃນການຜະລິດ ແລະ ສະຖານ ທີ່ທ່ອງທຽ່ວຈຳນວນໜຶ່ງ ຢູ່ພາຍໃນເມືອງຜາອຸດົມ.