ຕອນເຊົ້າ ວັນທີ 12 ກໍລະກົດ 2017 ນີ້, ຢູ່ທີ່ ສະໂມສອນ ເມືອງຜາອຸດົມ ແຂວງບໍ່ແກ້ວ ໄດ້ຈັດພິທີມອບ-ຮັບເງີນນະໂຍບາຍອຸດໜູນ ໃຫ້ແກ່ ຄອບຄົວຜູ້ທີ່ເສຍສະຫຼະຊີວິດ ຮັບໃຊ້ຊາດໃນປາງສົງຄາມ.ເຂົ້າຮ່ວມມີທ່ານ ພົງສະຫວັນ ປັນຍາສັກ ຮອງເລຂາພັກເມືອງ ຮອງເຈົ້າເມືອງ,ທ່ານ ຈອມສີ ລັດຕະນະປັນ ຄະນະປະຈຳພັກແຂວງ ຮອງເຈົ້າແຂວງໆບໍ່ແກ້ວ, ທ່ານພະຫົນພົມປັນຍາ ຫົວໜ້ພະແນກ ແຮງງານ ແລະ ສະຫວັດດີການ-ສັງຄົມແຂວງ,ມີບັນດາຄະນະການນຳຂອງເມືອງ,ພະນັກງານບຳນານ,ພະນັກງານເສຍອົງຄະ,ຕະຫຼອດຮອດ ຕາງໜ້າ ຄອບຄົວ ຜູ້ເສຍສະຫຼະ ຊີວິດ ເຂົ້າຮ່ວມ.

ພິທີ ໄດ້ຜ່ານຂໍ້ຕົກລົງ ຂອງນາຍົກລັດຖະມົນຕີ ກະຊວງແຮງງານ ແລະ ສະຫວັດດີການ-ສັງຄົມ,ສະບັບເລກທີ 1241/ຮສສ ວ່າ ດ້ວຍການຈັດຕັ້ງປະຕິບັດນະໂຍບາຍ ເງີນອຸດໜູນເສຍສະຫຼະຊີວິດ ປະຈຳສົກປີ 2017.ຜ່ານການເກັບກຳຂໍ້ມູນຕົວຈິງ ໃນສົກປີຜ່ານມາໃນນັ້ນຢູ່ເມືອງຜາອຸດົມ ໄດ້ມີຜູ້ທີ່ມີຄຸນງາມຄວາມດີ ເສຍສະຫຼະຊີວິດ-ເລືອດເນື້ອເພື່ອຊາດ ຈຳນວນ 63 ສະຫາຍ. ໂອກາດ ນີ້ທ່ານຈອມສີ ລັດຕະນະປັນ ຄະນະປະຈຳພັກແຂວງ ຮອງເຈົ້າແຂວງໆບໍ່ແກ້ວ ໄດ້ເປັນກຽດກ່າວມອບເງີນອຸດໜູນຈຳນວນ 1,317,735,000 ກີບໃຫ້ແກ່ ບັນດາ ຄອບຄົວ ຜູ້ສະຫຼະຊີວິດປາງສົງຄາມ ເພື່ອຈະໄດ້ນຳໄປໜູນໃຊ້ ໃນການທຳບຸນ ສິນກິນທານ ໃຫ້ແກ່ບັນພະບຸລຸດທີ່ໄດ ເສຍສະຫຼະຊີວິດ ເພື່ອປະເທດຊາດ:ເຊີ່ງອາດເວົ້າໄດ້ວ່າຖ້າ ບໍ່ມີພວກເພີ່ນ ອາດຈະບໍ່ມີພວກເຮົາ ໃນວັນນີ້.

ທ່ານ ພະຫົນ ພົມປັນຍາ ຫົວໜ້າພະແນກແຮງງານ ແລະ ສະຫວັດດີການ-ສັງຄົມ ໄດ້ມີຄຳເຫັນໃນຫຼາຍດ້ານເຊີ່ງທ່ານ ໄດ້ເນັ້ນໜັກ ແລະ ຮຽກຮ້ອງໃຫ້ຍາດຕິພີ່ນ້ອງ-ຄອບຄົວ ຜູ້ທີໄດ້ຮັບເງີນອຸດໜູນ ໃນຄັ້ງນີ້ ຈົ່ງພ້ອມກັນ ຮັກສາມູນເຊື້ອ ອັນເດັດດ່ຽວໜຽວແໜ້ນ, ພິລະອາດຫານ, ສືບຕໍ່ນຳໃຊ້ເງີນອຸດໜູນດັ່ງກ່າວ ໄປສ້າງເສດຖະກິດ ຄອບຄົວ ໃຫ້ນັບມື້ຮັ່ງມີເຂັ້ມແຂງ.
ຂ່າວ:ສົມພອນ ທະວີສິດ.