ສຸຂະພາບດີ ມີພາລານາໄມສົມບູນ ຈະຊ່ວຍເພີ່ມພູນ ຄວາມແຂງແຮງໃຫ້ແກ່ຄອບຄົວຂອງທ່ານ.ເມື່ອຈະກ້າວເຂົ້າສູ່ລະດູຮ້ອນຂອງທຸກໆປີ,ເນື່ອງຈາກດິນຟ້າອາກາດມີການປ່ຽນແປງ ຮ້ອນອົບເອົ້າແລະ ບວກກັບອາຫານການກິນປະຈໍາວັນເຊິ່ງເປັນສາເຫດໜຶ່ງເຮັດໃຫ້ຄົນເຮົາ ບໍ່ວ່າຈະເປັນຜູ້ໃຫຍ່ ແລະ ເດັກນ້ອຍ ເກີດມີອາການເຈັບເປັນບໍ່ສະບາຍ ຈາກການຕິດເຊື້ອພະຍາດຕ່າງໆຕາມລະດູການ,ໂດຍສະເພາະແມ່ນພະຍາດຖອກທ້ອງພະຍາດໄຂ້ຫວັດ ແລະ ພະຍາດອື່ນໆ.
ອີງຕາມຄຳນິຍາມຂອງອົງການອະນາໄມໂລກ ໃຫ້ຮູ້ວ່າ: ຜູ້ທີ່ເປັນພະຍາດຖອກທ້ອງ ຈະມີອາການ ຖາຍເປັນນໍ້າຫຼາຍກ່ວາ 3 ເທື່ອຕໍ່ມື້ຂຶ້ນໄປ ພ້ອມທັງຮາກ ຈະເຮັດໃຫ້ຮ່າງກາຍຂາດນ້ຳຜິວໜັງຫຽວແຫ້ງ,ຕາໂກນ,ປາກແຫ້ງ ແລະ ມີຄວາມອິດເໝື່ອຍຖ້າປ່ອຍ ປະໃຫ້ຄົນເຈັບມີອາການຂາດນໍ້າຢ່າງຮຸນແຮງໃນຮ່າງກາຍ ອາດຈະກ້າວໄປເຖິງຂັ້ນເສຍຊີວິດກໍ່ເປັນໄດ້ ດັ່ງນັ້ນ ເພື່ອຫຼີ້ກລຽງການເຈັບ ເປັນຈາກພະຍາດຖອກທອ້ງທຸກຄົນໃນສັງຄົມຕ້ອງໄດ້ເອົາໃຈໃສ່ໃນການປະຕິບັດ ຫຼັກການອະນາໄມສາມສະອາດ ເພື່ອສຸຂະພາບທີ່ດີ ຕ້ອງໄດ້ກິນອາຫານທີ່ສຸກ ແລະ ສະອາດດີ, ບໍ່ຄວນກິນອາຫານແບບສຸກໆ ດິບໆ,ອາຫານທີ່ບູດເນົ່າ ແລະ ອາຫານທີ່ມີສັດ ຫຼື ແມງ ໄມ້ໄຕ່ຕອມ ເຊັ່ນ:ວ່າ ໜູ,ແມງວັນ, ແມງໝີ່, ແມງສາບ, ມົດ ແລະ ອື່ນໆ. ອາຫານທີ່ປຸງແຕ່ງແລ້ວ ຄວນເກັບມ້ຽນໄວ້ໃນຕູ້ເຢັນ ຫຼື ມີຝາປົກປິດໃຫ້ດີ ກ່ອນນຳມາກິນຄືນໃໝ່ ດີແທ້ຄວນນຳໄປອຸ່ນກ່ອນແລ້ວຈິງເອົາມາກິນ. ຜັກ ແລະ ໝາກໄມ້ຕ່າງໆ ກໍ່ເຊັ່ນດຽວກັນ ກ່ອນຈະນຳມາປຸງແຕ່ງ ຫຼື ນຳມາກິນ ຕ້ອງລ້າງໃຫ້ສະອາດແຊ່ນໍ້າເກືອປະໄວ້ ຢ່າງນ້ອຍ 5-10 ນາທີ. ການບໍລິໂພກອາຫານສໍາເລັດຮູບ,ຕ້ອງໄດ້ກວດກາເບິ່ງ ວັນທີ, ເດືອນ, ປີໝົດອາຍຸເສຍກ່ອນ, ຈິງນໍາມາກິນ, ສິ່ງທີ່ສໍາຄັນຕ້ອງໝັ່ນລ້າງມື ໃຫ້ສະອາດໃນທຸກຄັ້ງ ກ່ອນທີ່ຈະປຸງແຕ່ງອາຫານ ແລະ ກ່ອນກິນເຂົ້າ, ຫຼັງກິນເຂົ້າ, ເມື່ອເວລາຈັບສິ່ງເປິເປື້ອນ, ສ່ວນພາຊະນະປຸງແຕ່ງອາຫານ ແລະ ບັນຈຸອາ ຫານຕ່າງໆ ເຊັ່ນ ຖ້ວຍບ່ວງ ແລະ ອື່ນໆກໍ່ຕ້ອງທຳຄວາມສະອາດເຊັນດຽວກັນ

ເພື່ອຮັບປະກັນຄວາມສະອາດຢູ່ສະເໝີ ຫຼັງຈາກການເຂົ້າຫ້ອງນໍ້າຖາຍໜັກ ແລະ ຖ່າຍເບົາ ຕ້ອງລ້າງມື ໃສ່ສະບູໃຫ້ສະອາດບໍ່ຄວນຖືເບົ່າ. ໃຫ້ເອົາໃຈໃສ່ເບິ່ງແຍງລູກຫຼານຂອງທ່ານໃຫ້ດີ ຕ້ອງຫຼີກລ່ຽງການກິນໝາກໄມ້ປະເພດທີ່ມີລົດຊາດສົ້ມຫຼາຍການດື່ມນ້ຳ ຕ້ອງດື່ມນໍ້າທີ່ຕົ້ມສຸກ ຫຼື ນ້ຳດື່ມບໍລິສຸດ ທີ່ໄດ້ຜ່ານການຂ້າເຊື້ອແລ້ວ. ຄວນສັງເກດເບິ່ງວ່ານ້ຳໃນຕຸກ ຫຼື ໃນຂວດນັ້ນມີການປ່ຽນສີບໍ່ ມີໄຄສີຂຽວ ຫຼື ຕົກຕະກອນ. ພາສະນະບັນຈຸນ້ຳ ໂຖນໍ້າ,ຈອກ ໂດຍສະເພາະແມ່ນຂວດນົມເດັກນ້ອຍ ຕ້ອງຮັບປະກັນຄວາມສະອາດ ທັງກ່ອນ ແລະ ຫຼັງການນຳໃຊ້. ຕ້ອງຢູ່ສະອາດ: ໝັ່ນອະນາໄມເຄື່ອງນຸ່ງຫົ່ມ, ສະຖານທີ ທີ່ຢູ່ອາໄສໃນເຮືອນ ແລະ ນອກເຮືອນເປັນປະຈໍາການກຳຈັດຂີ້ເຫຍື້ອຕ້ອງມີຖົ່ງໃສ່ ແລະ ຫຸ້ມຫໍ່ ປົກປິດ ບໍ່ໃຫ້ມີແມງວັນ ແລະ ແມງໄມ້ອື່ນໆ, ໄປຕອມ ດີແທ້ຄວນແຍກປະເພດຂີ້ເຫຍື້ອ, ປະເພດຢາງປຼາສະຕິກ, ເຈ້ຍ, ເສດຜັກ ແລະເສດໝາກໄມ້ ຕ່າງຫາກ. ເພື່ອສະດວກເວລາຖ່າຍຕ້ອງຖ່າຍໃສ່ວິດທຸກຄັ້ງ, ບໍ່ຄວນຖ່າຍແບບຊະຊາຍ. ເມື່ອທ່ານ ຫຼື ຄົນໃນຄອບຄົວ ເປັນພະຍາດຖອກທ້ອງ, ຕ້ອງໄປປິ່ນປົວ ຢູ່ຕາມສະຖານທີ່ບໍລິການສາທາລະນະສຸກ ທີ່ໃກ້ບ້ານຂອງທ່ານຢ່າງຮີບດ່ວນ ເຊັ່ນ: ສຸກສາລາ ຫຼື ໂຮງໝໍເມືອງ ຫຼື ໂຮງໝໍແຂວງ ທີ່ມີເງື່ອນໄຂສະດວກ. ບໍ່ຄວນໄປຊື້ຢາຕ້ານເຊື້ອ ແລະ ຢາຫ້າມປັ້ນມາກິນເອງ ຖ້າກິນບໍ່ຖືກຕາມຫຼັກການ ຈະເຮັດໃຫ້ທ້ອງເບັງ ຫຼື ລຳໄສ້ລ່ອຍ. ຄວນດື່ມນ້ຳເກືອແຮ່ອໍລາລິດ ໃຫ້ຫຼາຍໆ ເພື່ອທົດແທນນ້ຳທີ່ສູນເສຍໄປໃນຮ່າງກາຍ ພຽງແຕ່ປະຕິບັດຕາມຂັ້ນຕອນນິ້; ກໍ່ສາມາດປ້ອງກັນຕົວທ່ານເອງແລະຄົນໃນຄອບຄົວ ຈາກການເປັນພະຍາດຖອກທ້ອງ ຈະເຮັດໃຫ້ມີສຸຂະພາບດີ ແລະ ແຂງແຮງ ປອດໄພຈາກການເປັນພະຍາດໄດ້.
ສັງງລວມບົດສັ້ນໂດຍ: ເງິນຫຼົງ ຈິດພູວົງ.

ງານສະເຫຼີມສະຫຼອງ ປະຕູໂຂງເຂົ້າວັດ ປ່າອ້ອຍມະນີວັນ ທີ່ສ້າງຂຶ້ນໃໝ່ໄດ້ຈັດຂຶ້ນ ໃນຕອນເຊົ້າວັນທີ 12 ມີນາ 2023 ນີ້ ພິທີໄດ້ເລີ້ມປະຕິບັດຕາມທາງສາສະໜາ, ຕາມຮີດຄອງປະເພນີ, ເພື່ອເປັນສ້າງບຸນສິນກິນທານ, ມິຕິຍີນດີ ແລະ ເປັນສິລິມຸງຄຸນແກ່ເຈົ້າພາບເຈົ້າສັດທາ, ການສ້າງພັດທະນາວັດວາອາຣາມໃຫ້ມີຄວາມຈະເລີນຮຸ່ງເຮືອງສີວິໄລ ໂດຍສະເພາະການສ້າງປະຕູໂຂງເຂົ້າວັດໃນຄັ້ງນີ້, ເຂົ້າຮ່ວມເປັນປະທານຝ່າຍສົງມີ ພຣະອາຈານໃຫຍ່ ອາດຍາທຳ ຄຳເງິນ ຄຳວົງສ ປະທານ ອພສ ແຂວງບໍ່ແກ້ວ, ພະອາຈານ ບຸນນຳ ທຳມະວົງ ປະທານ ອພສ ເມືອງຫ້ວຍຊາຍ ເຈົ້າອະທິການວັດປ່າ ອ້ອຍມະນີວັນ, ພ້ອມພຣະສົງສາມະເນນ, ຝ່າຍຄະລືຫັດມີທ່ານ ເພັງສອນ ແກ້ວວິໄລ ຮອງເລຂາພັກແຂວງບໍ່ແກ້ວ, ມີຄອບຄົວຂອງທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ, ການນຳຂອງແຂວງ, ເມືອງ, ເຈົ້າພາບເຈົ້າສັດທາເຄົ້າ ຕະຫຼອດຮອດອອກຕົນຍາດໂຍມສາທຸຊົນບັນດາເຜົ່າ ເຂົ້າຮ່ວມເປັນຈຳນວນຫຼວງຫຼາຍ ຕາມຮີດຄອງປະເພນີຂອງຊາວພຸດທີເຄີຍປະຕິບັດກັນມາຕັ້ງແຕ່ດົນນານ. ເຊິ່ງໄດ້ມີການໄຫວ້ພຣະຮັບສິນ, ເທດສະໜາທຳ, ໃສ່ບາດຍາດນໍ້າ, ຖວາຍປະຕູ່ໂຂງ ແລະ ເຄື່ອງໄຊຍະທານ, ພັດຕະຫານ ໃຫ້ແກ່ພຣະສົງ ເພື່ອເປັນການສ້າງບຸນສ້າງກຸສົນ, ອຸທິດເຖິງຄຸນງາມຄວາມດີຂອງພະພຸດທະເຈົ້າ, ຄຸນພິດາ, ມານດາ, ຍາດຕິພີນ້ອງທີ່ລວງລັບໄປແລ້ວ ແລະ ເຈົ້າກຳນາຍເວນ ໄດ້ຮັບເອົາສ່ວນບຸນກຸສົນ, ຮັບພອນຂໍໃຫ້ບຸນຮັກສາເທວະດາຄຸ້ມຄອງ, ພົບແຕ່ສິ່ງທີ່ດີເຂົ້າມາໃນຊີວິດ, ມີໂຊກມີຫຼາກ, ສຸຂະພາບພາລາອານາໄມສົມບູນ, ປະສົບຜົນສຳເລັດໃນສ່ວນຕົວ, ຄອບຄົວຕະຫຼອດໄປ.
ນອກນີ້ ເຈົ້າພາບເຈົ້າສັດທາເຄົາການນຳຂອງແຂວງ, ເມືອງ ຕະຫຼອດຮອດອອກຕົນຍາດໂຍມສາທຸຊົນບັນດາເຜົ່າ ໄດ້ພ້ອມກັນແຮ່ຊໍ່ຍອດຟ້າປະຕູ່ໂຂງ 3 ຊໍ່ ຄື: ຊໍ່ເອກ, ຊໍ່ໂທ ແລະ ຊໍ່ນາງ ອ້ອມຮອບອາຣາມວັດ 3 ຮອບ ເພື່ອເປັນຍ້ອງຍໍການຊົມເຊີຍຜົນສຳເລັດການສ້າງປະຕູໂຂງເຂົ້າວັດ ແລະ ສັນລະເສີນການສ້າງພັດທະນາວັດວາອາຣາມໃຫ້ມີຄວາມຈະເລີນຮຸ່ງເຮືອງສີວິໄລ, ພ້ອມທັງເປັນສິຣິມຸງຄຸນໃຫ້ເຈົ້າພາບເຈົ້າສັດທາ ແລະ ອອກຕົນຍາດໂຍມສາທຸຊົນບັນດາເຜົ່າທີ່ມາຮ່ວມງານ. ຈາກນັ້ນນຳໄປຍໍໃສຈຸດກະກຽມເອົາຊໍ່ຍອດຟ້າ ຂື້ນໃສ່ຍອດປະຕູໂຂງ, ໂດຍໄດ້ໃຊ້ພາສະນາຄ້າຍຮູບຫົງຟ້າໃສ່ຊໍ່ຍອດຟ້າ ແລ້ວດຶງສາຍສະລິງຂື້ນເທື່ອລະຍອດ ມີພ້ອມທັງສູດສະຢັນໂຕເພື່ອເປັນສິຣິມຸງຄຸນຍິ່ງ. ປະຕູໂຂງເຂົ້າວັດປ່າອ້ອຍມະນີວັນ ແມ່ນມີຮູບຊົງແບບສິລະປະຫຼວດລາຍຫຼວງພະບາງ, ມີຄວາມສູງຈາກພື້ນຫາຈອມຍອດ 10 ແມັດ, ມີຄວາມກວ້າງ 5 ແມັດ, ມີສອງເສົາ, ເບື່ອງເທິ່ງຂອງປະຕູປະຕິມະກຳອອກແບບຄືທາດ ມີພຣະຍານາກທັງສອງສົນ, ໃຈກາງມີຮູບປັນພຣະບາງ, ມີ 3 ຈອມທາດມີຮູບກາທຳມະຈັກ, ປະຕູໂຂງຫຼວດລາຍປະດັບດ້ວຍສີຄຳ ແລະ ພື້ນແສກແດງ ທັງໝົດການຕົບແຕ່ງຢ່າງມີຄວາມສວຍງາມຖືກຕ້ອງຕາມວັດທະນະທໍາລາວ, ລວມມູນຄ່າການກໍ່ສ້າງທັງໝົດ 180 ລ້ານກວ່າກີບ ໂດຍແມ່ນທຶນຮ່ວມສົມທົບຂອງສັດທາເຄົາ ຂອງທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ພ້ອມຄອບຄົວ, ທ່ານ ບຸນເຫຼື່ອມ ສຸດທະວິໄລ ພ້ອມຄອບຄົວ, ທ່ານ ວິລອນ ພົງສະຫວັດ ພ້ອມຄອບຄົວ, ທ່ານ ອາຕົງ ພ້ອມຄອບຄົວ, ທ່ານ ພັນທອງ ວິໄລສານ ພ້ອມຄອບຄົວ, ທ່ານ ສຸກສົມພອນ ທິບພະພອນ ພ້ອມຄອບຄົວ, ທ່ານ ທະນົງສັກ ສຸບັນດິດ ພ້ອມຄອບຄົວ ແລະ ສັດທາທົ່ວໄປຮ່ວມບໍລິຈາກສົມທົບທຶນອີກຈຳນວນໜຶ່ງ.

ຄະນະປະຈໍາສະພາແຫ່ງຊາດ ມອບຄອມຜີວເຕີໂນດບຸກ ໃຫ້ແກ່ສະພາປະຊາຊົນແຂວງບໍ່ແກ້ວ
ທ່ານ ນາງ ທຸມມາລີ ວົງພະຈັນ ຄະນະປະຈໍາສະພາແຫ່ງຊາດ,ປະທານ ກຳມາທິການ ວັດທະນະທຳ-ສັງຄົມ ແລະ ບັນດາເຜົ່າ ພ້ອມຄະນະ ທີ່ໄດ້ມາເຄື່ອນໄຫວເຮັດວຽກຢູ່ແຂວງບໍ່ແກ້ວ. ໄດ້ນໍາເອົາຄອມພີວເຕີໂນດບຸກ ຈໍານວນ 5 ຊຸດ ມູນຄ່າ 25 ລ້ານກີບ. ມາມອບໃຫ້ແກ່ສະພາປະຊາຊົນແຂວງບໍ່ແກ້ວ ໃນວັນທີ 13 ມີນາ ນິ້. ຮັບເຄື່ອງດັ່ງກ່າວໂດຍແມ່ນ ທ່ານ ຈອມສີ ລັດຕະນະປັນ ຮອງເລຂາພັກແຂວງ ປະທານສະພາປະຊາຊົນແຂວງ. ເພື່ອຕອບສະໜອງຕາມຄວາມຮຽກຮອງ ຕ້ອງການອຸປະກອນທີ່ຈໍາເປັນເຂົ້າໃນການເຮັດວຽກງານວິຊາສະເພາະຂອງພະນັກງານວິຊາການໃຫ້ມີຄວາມສະດວກກວ່າເກົ່າ.
ປະທານສະພາປະຊາຊົນແຂວງບໍ່ແກ້ວ ໄດ້ສະແດງຄວາມຂອບໃຈ ມາຍັງທາງຄະນະປະຈໍາສະພາແຫ່ງຊາດ ທີ່ເປັນຫວ່ງເປັນໃຍເຫັນໄດ້ຄວາມຈໍາເປັນ ແລະ ຫຍຸ້ງຍາກຂາດເຂີນດ້ານອຸປະກອນຮັບໃຊ້ຫ້ອງການ ທາງສະພາປະຊາຊົນແຂວງ ຈະເອົາໃຈໃສ່ໃນການປົກປັກຮັກສາ ແລະ ນໍາໃຊ້ຄອມພີວເຕີໂນດບຸກ ເຂົ້າໃນວຽກງານລວມໃຫ້ໄດ້ຮັບຜົນປະ ໂຫຍດສູງສຸດ.
ຂ່າວ: ເງິນຫຼົງ ຈິດພູວົງ.